Молитвы преподобной Арсении Усть-Медведицкой (Себряковой)

Молитва 1-я преподобной Арсении Усть-Медведицкой

О, святая и достохвальная мати наша Арсение, земли Донския преславное прозябение и родителей благочестивых отрасле благословенная! 

Вонми молению нас, недостойных чад и соотчичей твоих, яже пред честною иконою твоею приносим ти ныне! Не возгнушайся гласом нашим, во гресех бо многих и лютых есмы, обаче на милость твою уповаем и за помощию и предстательством дерзаем прибегати к тебе! Умоли, ходатаице наша, Преблагаго Бога, да сохранит Церковь Свою от ересей и расколов, землю нашу Русскую от шатаний и нестроений, войн и междоусобий, народ наш от неверия и лености духовныя.

Вемы, яко много возлюбила еси и много ти от Бога дано ныне, тем же ныне не остави, без твоего молитвенного предстательства нас сирых и в добродетели убогих, и не престай простирати ко Господу многотрудныя руки своя за нас. Се славим праведное житие твое, чтем подвиги твоя, и мольбы своя тебе, яко самей живей сущей с нами приносим. Се собрахомся ныне во обители твоей (пред иконой твоей) и молим тя: да не отыдет благодать Божия от места подвигов твоих, да не угаснет зде (тамо) лампада молений иноческих, да умножится стадо Христово, и да обратятся ко Господу вси, не ведящии Его. Умоли Всеблагаго Бога, да пощадит ны и время для истиннаго покаяния дарует, да грехи и беззакония препобедив, достигнем небесных и вечных обителей, идеже вкупе с тобою и со всеми святыми прославим Имя Отца и Сына и Святаго Духа во веки веков. Аминь.

Молитва 2-я преподобной Арсении Усть-Медведицкой

О святая угоднице Божия, преподобная мати Арсение! Подвигом добрым подвизавшися на земли, восприяла еси на Небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам, рабам Божьим (имена) всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.